牛市一般会经历三期，当去到牛市第三期, 股票的基本因素, 公司赚唔赚钱, 派唔派息, 都唔够市场上的参与者的情绪影响咁大。大涨小回, 甚至系利淡新闻都当好消息。市场上面有主题、有资金, 气氛乐观, 个市就系咁升。
　　
　　过往几次大牛市点发展, 或者有咩特征, 我本书写左好多篇幅, 呢度唔多讲了。
　　
　　既然响牛市三期, 咁应该点做呢?
　　
　　大升市会否短期内几个月就玩完? 我觉得唔会。市场尚未见到有咩主题/因素、潜在主题/因素能够推倒大牛市。所以重申一次, 因未见有明确能推倒牛市的因素, 我不是由看好变看淡, 而只是中立Neutral, 暂时亦不打算造淡。但不会再因为坚持系牛市, 而不断唱好, 或者坐定定咩都唔做。牛市未玩完但相信较大调整在所难免。
　　
　　以价值投资黎讲, 似乎手上唔少公司的股价已经反映左价值。
　　
　　牛三最疯狂升得最急的时期可能未到, 但个人做法会系留意个别情况而开始逐步减持。
　　
　　呢几年黎除左有一两次讲过话手上高息股股价升得太多后, 股息率不再吸引而减持收息股/换马外, 应该无提过话要减持, 而今次先系第一次。
　　
　　按计划最先讲byebye的应该系股价无咩跟大市升过的公司 (有不少公司股价比历史高位仲系低近一半, 无乜点升过)。
　　
　　点解? 唔惊佢地追落后咩? 我都惊佢地会响我讲完byebye时追落后, 但系个市升左咁耐兼破埋历史高位, 两三年来都未见佢地追落后, 点解会觉得而家先黎追落后? 而且, 响泡沫爆破/大跌市时, 落后的股票通常都会跌埋一份。
　　
　　而最后留响手的应该会系一堆用作收息而基本因素良好的公司 (我的准则系市盈率低于10, 市账率低于0.8, 息率6-10%)。
　　
　　预算直到历史市盈率去到约20倍 (与现水平距离约5000点), 应该清了接近一半仓。留返的一半仓就差唔多系上年所赚的净利润, 输晒都唔会肉痛, 就由得佢继续放风筝。
　　
　　升市莫估顶, 我一定唔会沽清, 因为牛三最疯狂升得最急的时期, 几日可能回报百份比已达双位数。但回调/下跌的时候亦会好急, 所以实在好难捕捉到近顶位的几日。
　　
　　但系好多股评人而家话卖左买唔返, 我一笑置之。两年前又唔见佢地咁讲?
　　
　　市盈率真系去到20倍的话, 我唔信两年内都可以保持到20倍的水平。两年内我唔信无机会再买返, 不过到时可能系大市转向, 俾你买得返都唔想要。
　　
　　总结一句: 君子不立危墙之下。